આદિપુર /રિસોર્ટમાં ગલૂડીયાને મારી નાખનાર વિરૂધ્ધ ફોજદારી

રિસોર્ટમાં ગલૂડીયાને મારી નાખનાર વિરૂધ્ધ ફોજદારી

વીડિયો એસપી પાસે પહોંચતાં PSI ફરિયાદી બન્યા

ગાંધીધામ. આદિપુરના એક રિસોર્ટમાં કામ કરતા એક કર્મચારીએ કુતરા અને ગલૂડિયાને ત્રાસ આપસ ગલૂડીયાની ગરદન મરોડી ક્રૂરતા પૂર્વક મારી નાખ્યું હોવાના બનાવમાં એસપીની સૂચના મુજબ પીએસઆઇએ જાતે ફરિયાદી બની આરોપી વિરૂધ્ધ ગુનો નોંધી વધુ તપાસ હાથ ધરી છે.આદિપુર નજીક ગળપાદર રોડ પર આવેલા શર્મા રિસોર્ટ, ક્વોલિટી ઇન પ્લામ, 255 સર્વે નંબર 98માં કામ કરતા એક નેપાળી કર્મચારી ખુમકીલી રોલોગન્સે સંગતમ કુતરા અને ગલુડીયાને શારિરીક ત્રાસ આપતો હોવાનો તેમજ ગલૂડિયાને ક્રુરતા પુર્વક ગરદન મરોડી મારી નાખતો વીડીયો પઇટીએ નામની સંસ્થાના સભ્ય નેહા ચતુર્વેદીએ પૂર્વ કચ્છ એસપી પરિક્ષિતા રાઠોડને મેઇલ મારફત મુકી આ પીશાચી કૃત્ય કરનાર ઇસમ વિરૂધ્ધ કડક કાર્યવાહી કરવા માંગ કરી હતી.

આ વીડીયોમાં નાગામીશ ભાષામાં એ કુતરાને શા માટે મારી નાખ્યો તે પોતાના મિત્રને કહી રહ્યો હોવાનું પણ જણાવ્યું છે. એસપીએ આ વિગતો અને વીડીયો આદિપુર પોલીસ મથકના પીએસઆઇને મુકી આરોપી વિરૂધ્ધ ગુનો નોંધી કાયદેસર કાર્યવાહી કરવા સૂચના આપી હતી. આ સૂચના મળતાં જ પીએસઆઇ એન.કે.ચૌધરીએ ખુમકીલી રોલનશે સંગકમ વિરૂધ્ધ ગુનો નોંધી કાયદેસર કાર્યવાહી કરી હતી. આ આરોપીને રાઉન્ડઅપ કરી લેવાયો હોવાનું પણ પોલીસ સૂત્રોમાંથી જાણવા મળ્યું છે પણ હાલ કોરોના વાયરસના પગલે નિયમો મુજબ ટેસ્ટ કરાવ્યા બાદ આરોપીની અટક બતાવાશે.