રાજ્ય સરકારનો નિર્ણય:કૃષિ કે પશુપાલન યુનિ. અને શૈક્ષણિક હેતુસર ખેતીની જમીન ખરીદવા કલેક્ટરની મંજૂરી નહિં લેવી પડે, ગણોત કાયદામાં સુધારો

• 
  કૃષિ-પશુપાલન યુનિ., મેડીકલ-એન્જિનિયરિંગ કોલેજો કે અન્ય શૈક્ષણિક હેતુસર ખેતીની જમીન ખરીદવા કલેકટરની પૂર્વ પરવાનગી લેવી નહિં પડે
• જમીનની ખરીદી કર્યા બાદ એક મહિનામાં જિલ્લા કલેકટરને જાણ કરી જરૂરી પ્રમાણપત્રો મેળવી નિયત સમયમાં પ્રોજેકટ કામગીરી શરૂ કરી શકાશે
• ઔદ્યોગિક હેતુનો ઉપયોગ શક્ય ન હોય તેવા કિસ્સામાં અન્ય હેતુ માટે જમીન વેચી શકાશે

• ગુજરાત સરકારે આજે જમીન ખરીદી અંગે ગણોત કાયદાઓમાં મહત્વપૂર્ણ મહેસૂલી સુધારો કર્યો છે. રાજ્ય મંત્રીમંડળના નિર્ણય મુજબ સમગ્ર રાજ્યમાં હવે, કૃષિ યુનિવર્સિટી, પશુપાલન યુનિવર્સિટી, મેડિકલ કોલેજ, ઇજનેરી કોલેજ કે અન્ય શૈક્ષણિક હેતુસર ખેતીની જમીન ખરીદવા માટે જિલ્લા કલેકટરની પૂર્વ પરવાનગી કે મંજૂરી નહિં લેવી પડે. આવી જમીનની ખરીદી કર્યા બાદ એક મહિનામાં જિલ્લા કલેકટરને જાણ કરી બોનાફાઇડ ઇન્ડસ્ટ્રીયલ પર્પઝની જેમ જ જરૂરી પ્રમાણપત્રો મેળવીને નિયત સમયમાં પ્રોજેકટ કામગીરી શરૂ કરી શકાશે.

  આ પહેલા કલેક્ટરની મંજૂરી લેવી પડતી હતી
  ભૂતકાળમાં આવી જમીન ખરીદી માટે બિન ખેડૂત સંસ્થાઓ કે વ્યક્તિઓ એ જિલ્લા કલેકટર પાસે મંજૂરી મેળવવાનું આવશ્યક હોવાના પરિણામે લાંબા સમય સુધી ટાઇટલ ક્લિયરન્સ, ઇન્સપેકશન વગેરેમાં જતો સમય અને પ્રોજેકટ શરૂ કરવામાં થતા વિલંબની સમસ્યાનો હવે આ નવી વ્યવસ્થામાં અંત આવશે.

  ઊદ્યોગ સિવાયના અન્ય હેતુ માટે જમીન આટલી જંત્રીના ભાવે વેચી શકાશે
  રાજ્યમાં બોનાફાઇડ ઇન્ડસ્ટ્રિયલ પર્પઝ માટે જો જમીન ખરીદી હોય, પરંતુ ઔદ્યોગિક હેતુનો ઉપયોગ શક્ય ન હોય તેવા કિસ્સામાં GDCR(જનરલ ડેવલપમેન્ટ કન્ટ્રોલ રેગ્યુલેશન્સ)ની જોગવાઇઓ મુજબ ઊદ્યોગ સિવાયના અન્ય હેતુ માટે પણ જમીન વેચી શકાશે.આવા કિસ્સાઓમાં પ્રમાણપત્ર મળ્યા મળ્યા બાદના 3 થી 5 વર્ષ માટે 100 ટકા,5 થી 7 વર્ષ માટે 60 ટકા, 7 થી 10 વર્ષ માટે 30 ટકા અને 10 વર્ષ પછી 25 ટકા પ્રવર્તમાન જંત્રીની નક્કી કરેલી કિંમતે આવી જમીન વેચાણ કરી શકાશે.
  તબદીલ કરાયેલ જમીન વેચાણ ગણવામાં આવશે નહિં
  આ પ્રકારની જમીનોના કિસ્સામાં કંપનીના મર્જર,જોઇન્ટ વેન્ચર,એમાલગ્મેશન(એકીકરણ) કે પોતાની જ પેટા કંપની, ગૃપ કંપની અથવા સહયોગી કંપનીને તબદીલ કરાયેલ જમીન વેચાણ ગણવામાં આવશે નહિં. આ વ્યવહારોમાં જંત્રીની માત્ર 10 ટકા કિંમત-પ્રિમિયમ ભરીને તબદીલ થઇ શકશે.

  દેવા વસુલી મારફતે થતી હરાજીમાં જમીન ખરીદનારે જંત્રીના 10 ટકા પ્રિમિયમ ભરવું પડશે
  ડેટ રીકવરી-દેવા વસુલી, NCLT(નેશનલ કંપની લો ટ્રીબ્યુનલ), લિકવિડેટર કે નાણાંકીય સંસ્થાઓ મારફતે થતી હરાજીમાં આવી જમીનો ખરીદનારે હરાજી હુકમના 60 દિવસમાં જંત્રીના ફકત 10 ટકા પ્રિમિયમ ભરવાનું રહેશે.

  રાજ્યમાં હોલિસ્ટિક ડેવલપમેન્ટની નવી દિશા ખોલી
  ગુજરાત મેડિકલ-એન્જિનિયરિંગ અને વ્યવસાયિક શૈક્ષણિક ક્ષેત્ર સાથો સાથ સુપર સ્પેશ્યાલિટી હોસ્પિટલ્સ સહિતનું હબ બન્યું છે, ત્યારે મુખ્યમંત્રીએ કૃષિ, પશુપાલન યુનિવર્સિટી તેમજ તબીબી-ઇજનેરી શિક્ષણ અને અન્ય શૈક્ષણિક હેતુઓ માટે સરળતાએ જમીન ઉપલબ્ધ થઇ શકે તે માટે રાજ્યમાં હોલિસ્ટિક ડેવલપમેન્ટની નવી દિશા ખોલી આપી છે.

  પડતર રહેલી જમીનોનો કાર્યક્ષમ ઉપયોગ શક્ય બનશે
  આ નિર્ણયથી ઊદ્યોગ સાહસિકો દ્વારા ખરીદવામાં આવેલી ખેતીની જમીનોના પ્રશ્નોનું નિવારણ થતાં પડતર રહેલી જમીનોનો કાર્યક્ષમ ઉપયોગ શક્ય બનશે. તેમજ વિકાસની નવી તકો-રોજગારીની નવી દિશા મળશે.